Veseli : “Ne kemi përcaktim të qartë evropian dhe perëndimor”
Sotë në Kuvendin e Kosovës mbahet seanca e jashtëzakonshme për marrëveshjen e Demarkacionit. Kjo është hera e tretë që do të tentohet që demarkimi i kufirit me Malin e Zi të përfundoj
Kryetari i Kuvendit të Kosovës, Kadri Veseli, ka folur për seancën e jashtëzakonshme lidhur me Projektligjin për shënimin e kufirit ndërmjet Kosovës dhe Malit të Zi.
Veseli është shprehur i bindur se deputetët do ta ratifikojnë Demarkacionin me Malin e Zi.
“Ne kemi përcaktim të qartë evropian dhe perëndimor”,
“Ne,do ta votojmë demarkacionin. Është çështje që i hap perspektivë Kosovës drejt Bashkimit Evropian”, ka deklaruar Veseli, raporton Gazeta Express.
“Jam shumë i sigurt në reflektimin e krejt kolegëve deputetë, se sa e rëndësishme është dita e nesërme”, ka thënë kreu i Partisë Demokratike të Kosovës.
Ai ka thënë se ratifikimi i Demarkacionit “nuk ka asnjë arsye të shtyhet. Ka mijëra arsye që të kalojë”
Edhe Shefi i Grupit Parlamentar të Partisë Demokratike të Kosovës, Memli Krasniqi, beson se votat e nevojshme për kalimin e Demarkacionit do të sigurohen në çastin e fundit.
Ai ka shprehur optimizëm se në momentin e votimit, Projektligji për demarkacionin do të përkrahet edhe nga ndonjë deputet i Lëvizjes Vetëvendosje apo i Listës Serbe.