Sipas analistit politik, Ayman al-Rafati,"Ata në Izrael u siguruan se ato që po ndodhnin në Bregun Perëndimor po ndodhnin sipas një plani të studiuar mirë, pas të cilit qëndronin Hamasi dhe Xhihadi Islamik, me mbështetjen e plotë të Hezbollahut dhe Gardës Revolucionare Iraniane."

Ja vlen të përmendet se kohëve të fundit, mediat dhe ekspertët izraelitë janë fokusuar tek Aruri, një zyrtar i lartë i Hamasit. Atij ia atribuojnë zbatimin e planit “Bashkimi i Shesheve”, bashkërisht me Hezbollahun dhe Iranin.

Në këtë plan përfshihet transformimi i Brigadave Qassam në një ushtri të plotë, përafrimi i veprimeve taktike me strukturë strategjike efektive dhe transferimi i teknologjive ushtarake iraniane në Hamas, duke përfshirë dronët vetëvrasës, sistemet kibernetike dhe teknikat e çaktivizimit të Kupolës së Hekurt.

Studiuesi politik Majd Dargham tha për The Cradle:

"Në raportet izraelite përsëritet fakti se pas zgjedhjeve të brendshme të planifikuara për një vit e gjysmë, Al-Aruri do të bëhet kreu i Byrosë Politike. Kjo do të thotë se izraelitët duan të ndërhyjnë në rrjedhën e zgjedhjeve [nëpërmjet rrugës së vrasjes], sepse suksesi i Al-Arurit nënkupton se Hamasi do të kalonte plotësisht në boshtin iranian, gjë që është ankthi më i keq i Izraelit."

Dergham shton:

"Izraeli e sheh udhëheqjen e Hamasit të vendosur në Doha dhe Turqi si më pak radikale sesa udhëheqjen e Hamasit me qendër në Gaza dhe periferitë jugore të Bejrutit. Fakti që kreu i byrosë politike të Hamasit banon në periferitë jugore, në bastionin e Hezbollahut, do të thotë unifikim i pikëpamjeve për komandimin e konfliktit dhe kjo nënkupton një hap përpara drejt strategjisë së bashkimit të fronteve. Me fjalë të tjera, Izraeli e sheh qartë se qoftë edhe përmes duarve të Hamasit dhe Xhihadit, Irani dhe Hezbollahu po veprojnë drejtpërdrejt në Bregun Perëndimor dhe se kjo harmoni nuk mund të sabotohet dhe do të zhvillohet më tutje nën një udhëheqje të Hamasit që hedh të gjitha vezët e saj në shportën iraniane."

Një përgjigje rajonale

Boshti i Rezistencës, veçanërisht Sekretari i Përgjithshëm i Hezbollahut, Hassan Nasrallah, njoftoi se për të mbrojtur liderët palestinezë në Liban, veçanërisht Saleh Al-Aruri dhe Ziyad Nahale, ata po merrnin pozicione të avancuara.

Nasrallah ka deklaruar më shumë se një herë në fjalimet e tij se Hezbollahu do të përgjigjet fuqishëm nëse ndonjë figurë libaneze, palestineze apo iraniane do të vritej në tokën libaneze. Më 2 shtator, Nasrallah u takua me Nahale dhe Al-Aruri për të diskutuar në lidhje me zhvillimet në Palestinë dhe përshkallëzimin e ngjarjeve në Bregun Perëndimor.

Qarqet e rezistencës spekulojnë se Izraeli mund të përpiqet të shmangë një konflikt të drejtpërdrejtë me Hezbollahun duke synuar liderët dytësorë në Gaza. Por, një operacion i tillë ka mundësi të shkaktojë një përgjigje të fortë ushtarake dhe kjo mund të përshkallëzohet në një konflikt në shkallë të plotë.