Në një takim të zhvilluar me Presidentin dhe Kabinetin këtë pasdite, udhëheqësi i Revolucionit Islamik, Ajatollah Sejjid Ali Khamenei, diskutoi çështjet prioritare të vendit, nga jetesa e njerëzve te prodhimi ekonomik, nga politikat energjetike e deri te administrata publike.

Udhëheqësi i Revolucionit Islamik deklaroi se qeveritë janë përgjegjëse për përmbushjen e nevojave themelore të popullit, siç janë jetesa, siguria, shëndeti, kultura dhe stili i jetës, dhe se prioritetet në këto fusha duhet të përcaktohen me kujdes.

Ajatollah Khamenei theksoi se çdo orë përfaqëson një mundësi dhe se këto orë duhet të transformohen në shërbim publik, duke thënë:

"Nëse mund ta shfrytëzojmë mundësinë e shërbimit, të shmangim përtacinë dhe kryerjen e shumë detyrave njëkohësisht, dhe të mos përfshihemi në detyra të panevojshme, problemet patjetër do të zgjidhen."

Duke theksuar nevojën për të përcaktuar saktë përparësitë e detyrave në zgjidhjen e problemeve, Ajetollah Khamenei tha: "Përcaktimi i prioriteteve është një nga linjat themelore të menaxhimit; urgjenca dhe infrastruktura e çështjeve duhet të merren në konsideratë në këtë drejtim."

Në takim u ndanë edhe disa sugjerime në lidhje me ekonominë, një nga problemet prioritare të vendit.

Udhëheqësi Revolucionar theksoi nevojën për të marrë masa më serioze për të lehtësuar shqetësimet e publikut në lidhje me rritjen e pakontrolluar të çmimeve dhe për të disiplinuar tregun, duke e përshkruar jetesën e njerëzve si një nga çështjet më të rëndësishme për vendin.

Sugjerimi i parë i Ajatollah Khameneit ishte "t'i kushtohej vëmendje prodhimit dhe të rigjallëroheshin njësitë e prodhimit":

“Kushdo që ka një kuptim realist dhe praktik të ekonomisë pajtohet se prodhimi është çelësi i përparimit ekonomik të Iranit, dhe për këtë arsye, duhet t'i kushtohet vëmendje e veçantë. Ndërprerjet e energjisë elektrike nuk duhet të imponohen në këto njësi (përveç në raste emergjence).”

Po ashtu edhe “Furnizimi në kohë dhe i plotë me nevojat themelore” u theksua si një përparësi tjetër.

Udhëheqësi Revolucionar deklaroi se besueshmëria e aksioneve parandalon rritjen e çmimeve të krijuara nga oportunistët, duke reflektuar kështu drejtpërdrejt në tryezat e njerëzve dhe duke eliminuar kërcënimin ushqimor.

Duke kritikuar monopolin mbi importin e disa produkteve thelbësore, Udhëheqësi Revolucionar deklaroi se kjo ua lidh duart autoriteteve:

"Bëjini importet e mallrave thelbësore konkurruese dhe lejoni që qeveritë të sigurojnë furnizimet e tyre nga burime të ndryshme. Kjo do të ulë çmimet e valutës së huaj dhe të rialit."

Ai theksoi edhe një herë rëndësinë e praktikave që synojnë të sigurojnë që publiku të mund të blejë dhjetë produkte bazë pa u shqetësuar për çmimin.

Duke vënë në dukje "disiplinën e tregut", ai deklaroi se publiku nuk duhet të ndiejë se tregu është braktisur dhe çmimet janë të paqëndrueshme; kjo situatë ndikon negativisht në moralin e publikut.

Udhëheqësi Revolucionar deklaroi se duhet t'i kushtohet vëmendje rezervave të nevojshme të gazit dimëror dhe eliminimit të deficitit të gazit përmes importeve, duke shtuar se duhet të ndiqen propozimet për zgjidhje të pjesshme për problemin e strehimit.

Duke folur për faktorët që çuan në rënien e prodhimit të naftës, Udhëheqësi Revolucionar u shpreh:

“Të shfrytëzohen njerëz të rinj dhe të arsimuar për të zgjidhur problemet dhe për të transformuar prodhimin dhe nxjerrjen e naftës. Lëvizshmëria në eksportet e naftës duhet të rritet dhe portofoli i klientëve duhet të diversifikohet dhe zgjerohet.”

Lideri i Revolucionit, i cili e sheh të domosdoshme marrjen nën kontroll të konsumit dhe parandalimin e shpërdorimit, theksoi se sidomos në sektorin publik duhet të shmanget shpërdorimi i ujit, energjisë elektrike, gazit dhe ndërtesave, udhëtimeve të panevojshme, shoqëruesve të tepërt dhe akomodimeve në hotele luksoze, si dhe theksoi gjithashtu se, në vend të atmosferës së gjendjes “as luftë, as paqe”, duhet të mbizotërojë klima e punës, përpjekjes dhe shpresës.

Duke deklaruar se duhen marrë masa më serioze në fushën e ekonomisë dhe jetesës publike, Ajatollah Khamenei theksoi se nuk duhet të mbështetemi në zhvillimet e jashtme:

"Secili ka detyrat e veta, por ne duhet ta kapërcejmë situatën 'as luftë as paqe' që armiku po përpiqet të imponojë me motivim, vendosmëri, shpresë dhe frymë pune; përndryshe, kjo situatë është e dëmshme dhe e rrezikshme për vendin."

Udhëheqësi Revolucionar theksoi se konsolidimi i forcës dhe dinjitetit kombëtar është përgjegjësia kryesore e qeverive, duke thënë:

"Më e rëndësishmja nga këto është fryma, motivimi, uniteti dhe shpresa e kombit; këto duhet të ndërtohen përmes fjalëve dhe veprimeve dhe dobësimi i tyre duhet të parandalohet."

Udhëheqësi Revolucionar theksoi se ata që janë të angazhuar në komunikim me shkrim dhe vizual me zyrtarët duhet të nxjerrin në pah pikat e forta reale dhe shpresëdhënëse të vendit dhe shoqërisë, të përcjellin me saktësi forcën, kapacitetin dhe burimet ekzistuese të vendit, dhe të shmangin narrativat e dobësisë dhe pamjaftueshmërisë, si dhe propozoi që shtypi dhe Korporata Iraniane e Transmetimeve duhet ta marrin përsipër këtë përgjegjësi.

Udhëheqësi Revolucionar falënderoi iniciativat dhe përpjekjet e Zëvendëspresidentit të Parë të Republikës së Iranit, Mohammad Riza Arif, si dhe theksoi rëndësinë e takimeve të mbajtura për të ndjekur vendimet e qeverisë.

Ajatollah Khamenei falënderoi Presidentin, zyrtarët, administratorët dhe punonjësit e qeverisë të cilët treguan mund, duke vlerësuar veçanërisht institucionet që bënë sakrifica të vërteta gjatë luftës 12-ditore.

Ai vlerësoi motivimin, përkushtimin dhe produktivitetin e Presidentit:

“Udhëtimi i suksesshëm i z. Pizishkian në Kinë krijoi terren të mundshëm ekonomik dhe politik; këto rezultate të dobishme duhen ndjekur.” – u shpreh ai.

Ai gjithashtu i vlerësoi vërejtjet e Presidentit në takim si një shembull të një "rrëfimi force, shprese dhe talenti", duke deklaruar se motivimi, vendosmëria dhe një shpirt i fortë janë themeli për arritjen e qëllimeve dhe aspiratave.

Udhëheqësi Revolucionar e përshkroi realizimin e qëllimeve, mësimeve dhe ligjeve islame si themelin e sistemit, duke thënë se: "Imam Khomeini i përcaktoi këto parime që nga dita e parë".

Duke e përshkruar zbatimin e vendimeve si një përparësi kryesore, Udhëheqësi Revolucionar deklaroi se Presidenti po e monitoron këtë proces përmes vizitave shtetërore, turneve ministrore dhe komunikimit të ngushtë me publikun dhe administratorët; por theksoi se nëse nuk nxitet e njëjta frymë midis udhëheqësve të nivelit të mesëm, vendimet do të dobësohen brenda hierarkisë së udhëheqësisë dhe nuk do të zbatohen.

Ajatollah Khamenei shprehu kënaqësinë e tij për mundësinë për të ndërtuar konsensus në vend, duke vlerësuar empatinë, mbështetjen dhe bashkëpunimin e krerëve të tre organëve të pushtetit. Por, ai deklaroi gjithashtu se edhe sektorët vendimmarrës dhe ekzekutiv duhet të marrin pjesë aktive në këtë proces.

Ai theksoi se mundësia aktuale për pajtim është më e madhe se në të kaluarën dhe u shpreh se: “Kjo mundësi duhet të përdoret për detyra të rëndësishme, siç janë thjeshtimi i qeverisë dhe zvogëlimi i institucioneve, ekzistenca e të cilave është e barabartë me mungesën e tyre.”

Në pjesën e fundit të fjalimit të tij, Udhëheqësi Revolucionar iu drejtua krimeve të kryera nga Izraeli në Gaza dhe fatkeqësive që ka shkaktuar, duke theksuar se këto fatkeqësi, edhe nëse mbështeten nga fuqi si Shtetet e Bashkuara, mund të kapërcehen.

Ai deklaroi se vendet që protestojnë kundër pushtimit, veçanërisht vendet islamike, duhet të ndërpresin plotësisht lidhjet e tyre tregtare dhe politike me këtë regjim dhe ta izolojnë atë.

Duke e përshkruar Izraelin si "regjimin më të izoluar dhe të urryer në botë", ai tha se një nga linjat themelore të politikës së jashtme duhet të jetë inkurajimi i mëtejshëm i qeverive në këtë drejtim.

Qeveria shpalli prioritetet e saj: "Ne mund të kapërcejmë çdo problem"

Presidenti iranian Masoud Pizishkian premtoi se, i frymëzuar nga sugjerimet e Udhëheqësit Revolucionar, qeveria do të bënte përpjekje për të eliminuar të gjitha mangësitë.

Pizishkian theksoi se "të gjitha problemet do të kapërcehen nëpërmjet besimit në Zot, udhëzimit të Udhëheqësit Revolucionar dhe pjesëmarrjes së popullit", duke shtuar: "Ne do t'i kapërcejmë të gjitha këto probleme".

Pizishkian theksoi se forcimi i unitetit dhe integritetit kombëtar është një nga prioritetet kryesore të qeverisë:

“Nëse të gjithë qëndrojmë të bashkuar, asnjë forcë nuk mund t’i gjunjëzojë iranianët. Ashtu si empatia publike e la armikun të pafuqishëm në luftën e fundit, nëpërmjet pjesëmarrjes së publikut mund të kapërcehen të gjitha problemet.”

Duke raportuar mbi programet dhe aktivitetet më të rëndësishme të qeverisë vitin e kaluar, Pizishkian renditi çekuilibrin e energjisë, thatësirën dhe disa çështje të jashtme si sfidat kryesore në vitin e parë të qeverisë së 14-të, duke theksuar ndikimin e drejtpërdrejtë të energjisë në prodhim.

Ai deklaroi se kishin bërë përpjekje të mëdha për të zgjidhur problemin e energjisë dhe se krahasuar me vitin e kaluar, situata ishte përmirësuar.

Presidenti i kërkoi falje publikut dhe prodhuesve për ndërprerjet e pashmangshme të energjisë elektrike dhe gazit, pasi çekuilibri nuk është rregulluar ended he njoftoi se Ministria e Energjisë e konsideroi efektiv planin e këtij viti për uljen e konsumit të energjisë elektrike dhe se ekipet e ekspertëve të përbërë nga profesorë kryesorë ishin krijuar në përputhje me parashikimin e thatësirës së vazhdueshme.

Presidenti kujtoi planin për të instaluar 7,000 megavat energji diellore deri në fund të vitit, duke deklaruar se rezervat e karburantit janë rritur me më shumë se 3 miliardë metra kub këtë vit dhe se dimri do të jetë më pak problematik se vitin e kaluar.

Presidenti renditi rritjen ekonomike dhe kontrollin e inflacionit midis prioriteteve të qeverisë.

Ai deklaroi se zgjerimi dhe rritja e shpenzimeve janë shkaqet kryesore të inflacionit dhe njoftoi se do të ndjekin reforma në strukturën administrative, duke e bërë qeverinë më të vogël dhe më fleksibile, duke forcuar bashkëpunimin me parlamentin dhe institucionet e tjera dhe duke strukturuar buxhetin me një sistem pagesash të bazuar në performancë.

Ai shtoi se problemet në sistemin bankar ndikojnë gjithashtu në inflacion dhe se Banka Qendrore është përgjegjëse për monitorimin e kësaj situate.

Pizishkian deklaroi se promovimi i drejtësisë në arsim është një përparësi kryesore, duke vënë në dukje se në vitin e ri akademik u hapën 2,400 shkolla të reja.

Ai u shpreh se: "Ne po kryejmë një lëvizje gjithëpërfshirëse për ndërtimin e shkollave me një model të bazuar në lagje dhe pjesëmarrje publike."

Ai e përshkroi gjithashtu ndarjen e kuponave ushqimore për shtatë të shtatën e shoqërisë si një masë për të ulur koston e jetesës së publikut dhe për të rritur mirëqenien sociale, dhe deklaroi se kjo praktikë do të vazhdohej me vendosmëri.

Presidenti deklaroi se plani i Mjekut Familjarë dhe Sistemit të Referimit do të ndiqet në sektorin e shëndetësisë.

Ai vlerësoi rolin e personelit të kujdesit shëndetësor në luftën e fundit dhe deklaroi se programi diplomatik i qeverisë është të zhvillojë marrëdhëniet me jashtë:

“Marrëdhëniet e vendit me fqinjët e tij janë më të mira në çdo fushë sesa në të kaluarën; me forcimin e këtyre marrëdhënieve, ideja që Evropa dhe Amerika të na ndalojnë me sanksione nuk do të funksionojë.”

Duke iu referuar marrëveshjeve të rëndësishme të nënshkruara me Rusinë, Kinën, Irakun, Turqinë dhe vendet e Euroazisë, Pizishkian vuri në dukje angazhimin e palëve për zbatimin e këtyre marrëveshjeve.

Presidenti i dha përparësi zhvillimit të infrastrukturës jetësore, duke përfshirë përfundimin e korridoreve kryesore, porteve dhe autostradave, dhe njoftoi se hekurudha Zahedan-Chabahar do të përfundojë deri në fund të vitit.

Pizishkian njoftoi se në sektorin e naftës dhe gazit, këtë vit synohet të rritët prodhimi me 250,000 fuçi në ditë.

Për më tepër, ai tha se vlera e më shumë se 10 milionë metrave kub të gazut të djegur të mbledhur këtë vit është 700 milionë dollarë dhe se brenda një apo dy viteve të ardhshme i gjithë gazi i djegur do të rikthehet në qarkullim.

 

 

Burimi : Yakın Doğu Haber