Zëvendës Përfaqësuesja Speciale e SHBA-së për Lindjen e Mesme, Morgan Ortagus, i bëri thirrje qeverisë libaneze të marrë një vendim për "çarmatimin" e Hezbollahut dhe tha se Libani ka ende "shumë punë për të bërë" në këtë drejtim.

Duke folur në Forumin Ekonomik të Katarit në Doha të martën, Ortagus u shpreh se: “Libani ka ende shumë për të bërë për të çarmatosur Hezbollahun.”

Përfaqësuesja e SHBA-së deklaroi se zyrtarët libanezë “me gjasë kanë arritur më shumë në gjashtë muajt e fundit sesa në pesëmbëdhjetë vitet e fundit”.

Zyrtarët libanezë kanë konfirmuar se, nën presionin në rritje të Shteteve të Bashkuara së fundmi, dhe pas humbjeve të mëdha në strukturat ushtarake dhe të udhëheqjes së Hezbollahut gjatë luftës me Izraelin, kanë marrë vendimin që “armët t’i kalojnë në pronësi të shtetit”.

Ortagus theksoi se Shtetet e Bashkuara të Amerikës kërkojnë “çarmatosjen e plotë të Hezbollahut”.

“Ajo nuk vlen vetëm për jugun e Lumit Litani, por për gjithë vendin,” u shpreh ajo, duke i bërë thirrje udhëheqjes libaneze që “të marrë një vendim” për këtë çështje.

Përfaqësuesja amerikane ka vizituar disa herë Libanin që nga ardhja në detyrë e Presidentit të SHBA-së, Donald Trump, dhe kjo shihet si pjesë e presionit të vazhdueshëm mbi Libanin në kuadër të periudhës së pasluftës me Izraelin dhe sulmeve që kanë vijuar pavarësisht marrëveshjes për armëpushim që hyri në fuqi më 27 nëntor.

Sipas gazetës Al-Akhbar, Ortagus, në takimet e saj të mëparshme në Bejrut, kishte bërë thirrje për çarmatosjen e rezistencës në një atmosferë të tensionuar, të mbushur me kërcënime dhe presion.

Një marrëveshje armëpushimi mes Hezbollahut dhe Izraelit, e ndërmjetësuar nga SHBA dhe Franca, është në fuqi që nga 27 nëntori.

Kjo marrëveshje parashihte tërheqjen e luftëtarëve të Hezbollahut nga zona në jug të Lumit Litani (rreth 30 kilometra nga kufiri), si dhe çmontimin e infrastrukturës ushtarake në atë rajon. Në këmbim, forcat e ushtrisë libaneze dhe Misioni i Përkohshëm i Kombeve të Bashkuara në Liban (UNIFIL) do të forconin praninë e tyre pranë kufirit me Izraelin.

Ortagus e përsëriti kërkesën e SHBA-së për “çarmatosjen e plotë të Hezbollahut”, duke theksuar se kjo kërkesë nuk vlen vetëm për jugun e Litani-t, por për të gjithë vendin. Ajo i bëri thirrje udhëheqjes libaneze që të marrë një vendim në këtë drejtim.

Marrëveshja gjithashtu kërkonte që Izraeli të tërhiqej nga zonat që kishte pushtuar gjatë luftës. Megjithatë, edhe pas skadimit të afatit, Izraeli vazhdoi të mbante forcat e tij në pesë kodra strategjike që i japin mundësi kontrolli mbi të dy anët e kufirit.

Sulmet vazhdojnë, veçanërisht në jug.