Hizbullahu : Rreziku për kryetarin e Sirisë është eliminuar

Qeveria e kryetarit të Sirisë, Bashar Assad nuk është më në rrezik  të bie, tha udhëheqësi i grupit militant Hizbullah në Liban në një intervistë me një gazetë libaneze.

     Në një intervistë me gazetën ditore As- Safir, Hassan Nasrallah tha, gjithashtu, se kërcënimi i bombave në Liban ka rënë në mënyrë të konsiderueshme për shkak të masave të miratuara përgjatë kufirit libanezo - sirian.

     Militantët e Hizbullahut kanë luftuar përkrah trupave qeveritare siriane kundër rebelëve të cilët përpiqen për të larguar Assadin nga pushteti. Luftëtarët e grupit shi’it ishin instrumenti kryesor për të ndihmuar forcat e Assadit që të largojnë luftëtarët e opozitës nga fortesat e tyre përgjatë kufirit.

     Megjithatë, roli publik i Hizbullahut në konfliktin tre vjeçar ka përflakur tensionet sektare në Liban. Muslimanët sunni të vendit kanë mbështetur rebelët sirianë. Në javët e fundit, militantët sunni kanë kryer disa sulme vdekjeprurëse në fortesat e Hizbullahut në Liban, duke pretenduar se ato ishin në shenjë hakmarrjeje për ndihmën e Hizbullahut për qeverinë siriane.

     Sa për qeverinë e Assadit në Damask, Hassan Nasrallah tha: Rreziku i rënies së regjimit sirian ka përfunduar.

     Konflikti në Siri filloi me protesta paqësore në muajin mars 2011. Protestat u shdërruan në një luftë civile me ngjyrime sektare dhe ekstremistët  islamikë, përfshirë luftëtarë të huaj dhe rebelë sirianë që kanë marrë ideologjinë e vijës së ashpër të stilit të el – Kaides, kanë luajtur një rol gjithnjë e më të shquar në mesin e luftëtarëve, dhe uljen mbështetjes së Perëndimit.

Më shumë se 150.000 njerëz janë vrarë në tre vitet e fundit në Siri, thonë aktivistët.

Burimi: AP - Bejrut