Kardinali Jean-Louis Tauran në Mitingun e Riminit: Luftërat nuk janë fetare, por politike

Vijon, në Rimini të Italisë, Mitingu tradicional, nën shenjën e dialogut ndërfetar. Punimet i hapën një katolik, një hebre e një mysliman, që dëshmuan se fetë janë për ta ndërtuar, e jo për ta shkatërruar njeriun”. E pikërisht për rolin e feve foli, në ditën e dytë të Mitingut, kryetari i Këshillit Papnor për Dialogun ndërfetar, kardinali Jean-Louis Tauran, sot, në mikrofonin e Radio Vatikanit tha:

Përgjigje: Në kohët tona nuk ka asnjë konflikt, që të jetë me natyrë fetare. Të gjitha konfliktet, me të cilat, për fat të keq, duhet të merremi, janë pasojë e arsyeve politike. Por, po ta vëresh mirë botën e sotme, nuk mund ta kuptosh pa fetë. E ky është paradoksi i madh. Një shekull më parë patën thënë: “Zoti vdiq!”. Por sot po e shohim se nuk ka vdekur aspak, se është i gjithëpranishëm. Prej këndej, pikërisht ky paradoks, na nxit të dialogojmë, sepse Zoti bën pjesë në jetën e njeriut të sotëm. Njeriu është “frymor” fetar.

Pyetje: Atëhere pse ndodh që fetë të jenë të pranishme pikërisht në konflikt?

Përgjigje: Para së gjithash, nuk janë fetë të pranishme, por ndjekësit e tyre, burra e gra me vulën e mëkatit të rrjedhshëm. E prej këndej, e dimë - e thotë Kushtetuta Konciliare Gaudium et spes - se dhuna do të jetë deri në fund të fundit të botës. Duhet, prandaj, t’i bëjmë ballë kësaj dhune. Ta mundim të keqen, me të mirë.

Pyetje: Shumë qeveri “laike”, për të shmangur konfliktet, e shpërfillin identitetin, edhe atë fetar: ju duket udhë e drejtë kjo?

Përgjigje: Jo, sepse në dialogun ndërfetar gjëja e parë tek e cila duhet të ndalemi, - siç e ka kujtuar edhe rektori i xhamisë së Lionit - është identiteti. Duhet ta dimë kush jemi, kujt i besojmë, cilat janë vlerat universale, që na prijnë në jetë. Nuk ka dialog ndërfetar, ku ka mëdyshje. Ne duhet ta kemi parasysh, ta dimë mirë përmbajtjen e fesë sonë.

Pyetje: Feja dhe demokracia: shpesh ndërmjet tyre, dialogu nuk është aspak i lehtë...

Përgjigje:  ... me të drejtë: njeriu  është i lirë e shpesh herë e keqja sundon mbi të mirën. Ne duhet të veprojmë gjithnjë në mënyrë që forca e ligjit të  ketë epërsi mbi ligjin e forcës.

Pyetje: Integralizmi islamik, ç’ide ka për fenë?

Përgjigje: Integralizmi islamik, para së gjithash, nuk është islam i vërtetë. Është çoroditje. Integralistët janë grupe që, për fat të keq, gëzojnë mbështetjen e disa sektorëve, që nuk janë në favor të demokracisë.

Pyetje: Mungesa e paqes sot varet edhe nga besëlidhja ndërmjet fesë e pushtetit?

Përgjigje: Në disa raste, po. Pa harruar se fetë janë forcë e së mirës; e këtë e shikojmë vazhdimisht... Ka gjithnjë shumë rëndësi që mjetet e komunikimit të ngulin këmbë më shumë mbi këto aspekte pozitive: për shembull, një familje myslimane në Bagdad, që strehon prej dy vjetësh një familje të krishterë. Ky është fakt shumë i bukur, ose shembulli i etërve domenikanë, që dy vjet më parë themeluan, në Bagdad, Akademinë e Shkencave Shoqërore, ku kanë më se një mijë studentë, pothuajse të gjithë myslimanë. Këta shembuj janë rreze drite në errësirë, prej këndej duhet folur për ta.