Rouhani: Irani nuk heq dorë nga të drejtat bërthamore

Presidenti i Iranit, Hassan Rouhani thotë se Republika Islamike nuk do të heq dorë nga të drejtat e tij bërthamore, duke përfshirë edhe pasurimin e uraniumit për qëllime paqësore.

    Në një takim të dielën, më 8 dhjetor 2013, në Teheram, me Këshilltarin Shtetëror Kinez, Yang Jiechi, presidenti Hassan Rouhani tha:

     ”Aktivitetet bërthamore të Iranit janë dhe do të mbeten paqësore dhe  Irani nuk do të tërhiqet nga të drejtat e tij bërthamore, duke përfshirë  pasurimin e uraniumit.”

      Presidenti iranian i përshkroi më tej marrëdhëniet midis Teheranit dhe Pekinit si të forta dhe strategjike , duke shprehur gatishmërinë e Iranit për zgjerimin e marrëdhënieve dypalëshe midis dy kombeve.
     Yang Jiechi, nga ana e tij, tha se vendi i tij e respekton të drejtën e Iranit për të përdorur teknologjinë paqësore bërthamore, duke përfshirë edhe pasurimin e uraniumit, duke thënë se Teherani i ka mbrojtur të drejtat e tij gjatë diskutimeve me gjashtë fuqitë në Gjenevë. 

     Zyrtari kinez, gjithashtu, deklaroi se Pekini kërkon të zgjerojë bashkëpunimin rajonal dhe ndërkombëtar me Teheranin, duke përshkruar vendimet e fundit të vendit të tij për të rritur shkëmbimet ekonomike me Republikën Islamike.