Xhamia e Haxhi Kasëmit( Toskës)

E ka ngritur haxhi Kasëmi me gjasë para vitit 1520, pas ndërtimit të xhamisë së Suzi Qelebiut në vitin 1513.

 Në Kronikën e Mehmet Tahir efendiut për xhamin e Haxhi Kasëmit thotë se e ka ndërtuar rrobaqepësi i Mehmet Kukli beut , e që e quanin me emër haxhi Kasëmi[i].

Në Vakëfnamen e Kukli beut të vitit 1538 përmendet se ka ekzistuar kjo xhami por viti i saktë i ndërtimit nuk dihet pasi që nuk është ruajtur  mbishkrimi i ndërtimit të parë. Në Vakëfnamen e Kukli beut për xhamin e haxhi Kasëmit shkruan:” Dy ashere le t’i lexojë imami dhe myezini i mesxhidit i lagjes haxhi Kasim. Imamit të mesxhidit të theksuar ia ka caktuar nga dy akça e gjysmë për çdo ditë, kurse myezinit të saj së bashku me punën e kajimit(mirëmbajtësit) i ka caktuar nga një akça e gjysmë në ditë, kështu me  gjysmë akça për leximin e asheres në xhami t’i ketë dy akça në ditë, e imami i saj me gjysmë akça për leximin e asheres, t’i ketë tri akça në ditë. Mualimit i ka caktuar nga dy akça në ditë, e zëvendësit të tij një akça në ditë”[ii].

Këtë xhami e ka rindërtuar Mahmut Pashë Rotlla i Prizrenit në vitin 1831 për shpirt të nënës së tij të vdekur Hatman Hanmit. Mbishkrimi ekzistues i xhamisë është i vitit 1831 ku përshkruan emrin e rindërtuesit Mahmut Pasha[iii].

Pas luftës së fundit në Kosovë, pas vitit 1999 xhamia është rinovuar tërësisht, tani është në gjendje të mirë funksionale. Në popull përndryshe njihet me emrin xhamia e Toskës.