Përfundon Forumi III katoliko - mysliman. Myftiu Tërnava: feja islame është kundër dhunës.

Sipas Radio Vatikanit, kanë përfunduar punimet e Forumit III katoliko - mysliman organizuar në Vatikan nga Këshilli Papnor për Dialogun Ndërfetar mbi temën: 

“Të punojmë së bashku për t’u shërbyer të tjerëve”.

Në punime morën pjesë Presidenti i Këshillit Papnor për dialogun ndërfetar, kardinali Jean-Louis Tauran, sekretari i këtij organizmi. Nga ana myslimane mori pjesë Princi i Jordanisë Ghazi bin Muhammed, përfaqësues të Vende të ndryshme nga Indonezia, Afrika e Veriut, Amerika e Veriut dhe Evropa, përfaqësuar nga kryetari i Bashkësisë Islame të Kosovës, Myftiu Naim Tërnava. 

Forumi I u zhvillua tetë vjet pas Letrës së 138 personaliteteve intelektuale myslimane drejtuar Papës Benediktit XVI, pas ligjëratës së mirënjohur “letio magistralis” mbajtur më 12 shtator 2006, në Universitetin e Regensburgut mbi raportin ndërmjet fesë e arsyes. Papa Benedikti XVI me atë rast na nxiti të kemi guximin e hapjes sonë ndaj gjerësisë së arsyes e të mendimit për të realizuar një dialog të vërtetë të kulturave e feve, një dialog – pati pohuar Papa Ratzinger – për të cilin kemi nevojë urgjente. 

Forumi I i dialogut katoliko-mysliman u mbajt në Romë nga 4 deri 6 nëntor 2008 mbi temën “Dashuria e Zotit, dashuria e të fërmit”. 

Forumi II mbajtur në nëntor të vitit 2011, në Jordani, pati për argument reflektimet: “Arsyen, fenë e qenien njerëzore”. 
Ndërkaq më 18 e 19 nëntor, KAICIID (Qendra Ndërkombëtare e mbretit Abdullah Bin Abdulaziz për dialogun ndërfetar e ndërkulturor) organizon në Vjenë të Austrisë një dialog të nivelit të lartë ndërmjet përfaqësuesve fetar, gjatë të cilit do të bisedohet mbi temën “ Liderët fetarë kundër dhunës në emër të fesë”. 

E pikërisht rreth kësaj teme flet edhe myftiu i Kosovës Naim Tërnava në intervistën me dom David Gjugjën në studio të Radio Vatikanit. Feja e ushtrimi dhunës në emër të fesë; prania e radikalëve fetarë ndër shqiptarë; marrëdhëniet ndërmjet Bashkësive Islame të Kosovës, Shqipërisë, Maqedonisë e të Malit të Zi; marrëdhëniet ndërmjet Bashkësisë Islame e Kishës katolike në Kosovë, vlera e përmasës shpirtërore në shoqërinë e sotme.

Sipas Bashkësisë Islame të Kosëvës, Myftiu i Kosovës, Naim ef.  Tërnava i cili po merr pjesë në Forumin e tretë të dialogut  ndërfetar Katoliko -Mysliman, që po mbahet në Vatikan, sot paradite së bashku me pjesëmarrësit e Forumit, është pritur në audiencë nga Papa Françesku.

Papa Fançesku në  fjalën e tij përshëndetëse u  shprehu mirëseardhje përfaqësuesve mysliman në forum, si  dhe i falënderoi ata për kontributin që po japin në ndërtimin e paqes, homonisë, bashkëjetesës e tolerancës mes popujve dhe feve. Papa, në veçanti çmoi lartë kontributin e prijësve mysliman që po japin në këtë forum të përbashkët i cili ka për diskutim temën , Të punojmë së bashku për tu shërbyer të tjerëve.

Myftiu  i Kosovës, Naim ef. Tërnava në fjalën e tij falënderoi Papën për kontributin dhe kujdesin e Papës dhe Vatikanit për Kosovën. Myftiu i potencoi Papës nderin që i ka bërë kombit shqiptar me rastin e vizitës së tij në Shqipëri. Me këtë rast Myftiu Tërnava, Papës i  dhuroi Monografinë e xhamive të shkatërruara gjatë luftës së fundit në Kosovë.