“Thellësisht i prekur”, Papa Françesku dërgoi sot një telegram ngushëllimi për viktimat e tërmetit, që goditi mbrëmë popullsitë në kufirin ndërmjet Iranit e Irakut. Më se 300, viktimat e mijëra, të plagosurit e të mbeturit pa shtëpi.

Ati i Shenjtë, shkruhet në mesazhin e nënshkruar nga Sekretari i Shtetit të Vatikanit, kardinali Pietro Parolin, “shpreh dhimbjen e tij për të gjithë ata, të cilët vajtojnë humbjen e të dashurve” e lutet për të vdekurit.

Gjithashtu, “i kërkon Zotit bekime hyjnore ngushëllimi e force” për të plagosurit e për gjithë të impenjuarit në operacionet e shpëtimit e të ndihmës.

Tërmeti prej 7,3 ballësh e me thellësi 23 kilometra, pati si epiqendër Penjvinin, në provincën irakiane të Sulejmanijes, por pasojat më të rënda regjistrohen në Iran.

Situata më e vështirë është në qytetin malor Sarpol-e Zahab, ku janë shkatërruar gjysma e ndërtesave dhe është shembur rruga e vetme, që e lidh me botën.

Fatkeqësisht është shembur edhe spitali i vetëm, duke shkaktuar probleme për mjekimin e të plagosurve. Ndërkaq, arrin solidariteti i mbarë botës, duke filluar nga Bashkimi Evropian, Turqia e vendet e tjera fqinje.